МИН - ТАБИГАТЬ БАЛАСЫ!

Ябалак кар яуган төсле
Яфрак ява кыштыр-кыштыр.
Гүя урман икеләнә:
"Көз түгелдер, кыштыр, кыштыр?!"

Просеклар туры-туры -
алар урман коридоры.
Юлга калын палас җәя
Яфракларның саргылт хоры.

Миләш кызылга төренгән -
Яфрак кызыл, тәлгәш кызыл.
Каен сарыдан киенгән -
Урман күрке, урман кызы.

Тымызык җил исеп уза,
"Көзге урман" көен суза.
Баланнардан муенсалар
Аланнарга коелганнар.

Песнәк оча, ул ашыга
Тизрәк авылга кайтырга.
Көзен киткән кошлар өчен
Авыл ямен баетырга.